السبت، 13 أكتوبر 2012

ياما رينا و ياما من معارف واجدة حقينا



ياما رينا..
وياما من معارف واجده حقّينا..
ع الفيس ياما وياما رينا..

فيهم الزّين..
... وفيهم اللّي مجهول أصله امنين..
...
وفيهم اللي كذّاب بو وجهين..
وفيهم اللي داير معاي الشينه..
وفيهم اللي من ناس معروفين..
وفيهم اللي ب الروح شارك فينا..
وفيهم اللي اعرفناه هاذا وين..
بعد ما كان أقرب صداقه لينا..
وفيهم اللي في الأصل مجهولين..
وفيهم اللي يفخر اليوم علينا..
وفيهم اللي لهم تاريخ مشهورين..
وفيهم اللي أرقامهم اليوم خذينا..
وفيهم اللي اف عقله اليوم رزين..
وفيهم اللي اف عقله خفيف هوينه..
وفيهم اللي اف قلبه اليوم حزين..
وفيهم اللي اف قلبه سعيد حنينه..
وفيهم اللي من ناس ناس اخرين..
وفيهم اللي حتّى اليوم إنسينا..
وفيهم اللي طلب الصداقه الحين..
وفيهم اللي في الصوب توّا جينا..
وعلي قول فيهم كان هاذا لين..
ياما وياما من أبيات إتجينا..

ياما رينا..
وياما من معارف واجده حقّينا..
ع الفيس ياما وياما رينا.

ليست هناك تعليقات:

إرسال تعليق

نرحب بتعليقاتكم على منشوراتنا و تذكروا قول الله تعالى و ما يلفظ من قول إلا لديه رقيب عتيد