الاثنين، 30 يوليو 2012

يا أنظاري كفن - شعر شعبي ليبي للشاعر خسن المقرحي

يا أنظاري كفن شعر رائع للمبدع حسن المقرحي

يا انظاري كفن نار شوقه طفن .. كل ماجرى مقدر صار
نسيكن نسنا ماتسالن عنا .. ماو عاد للنا ماتفيد اعذار
اللي قبل ياما نفرحوا بملاما .. ونديروا علامة وقت لانتظار
ساعة لقانا بالعزيز منانا .. اللي بشوق جانا جيته بانوار
شبكنا ايدينا في الحديث بدينا .. وعود وعطينا ماتهون اقدار
وعشنا طرابا واللذيذ شرابا .. لكن اصحابه غيروا الافكار
منها تغير في الاثنين مخير .. وتما مسير من عدو نقار
ناسي كلاما ما يريد ملاما .. ساحب سلاما ماعليه اغبار
وعودا نسيها اللي فيها .. ومنها وبيها يطربن الانظار
واليوم هاهن والعزيز جفاهن .. وقلة نجاهن كل مايذكار
عزيز ونكرهن والزمان قهرهن .. ولا من عذرهن فيه باللي صار
مر وسقاهن بالجفا كافاهن .. وم الوقت قبله ضايقات امرار
جروحه بداها سايله بدماها .. وكبدي شواها فوق جمرة نار
وطابت سحنها ماو سايل عنها .. والعظم راح م السطير اكسار
غير مانشاكي بيه لاني باكي .. لنفسي نحاكي بيه باستمرار
وكل مانراجع ينقضن المواجع .. ويجني فواجع مغير ياستار
بروحي نقضي بالدموع نفضي .. وهكي نمضي فيه ليل نهار
والعقل راجا وبالروح قاجا .. وما نال حاجة مغير زاد اكدار
ومن قبل ضايق وما عاد طايق .. جرحه مسمر بيه سابع جار
وياما تغرب في الحيا ومجرب .. ومنها ادرب منكوي بالنار
ووقته تكرب مانهار يطرب .. والياس خرب كل مايندار
بجية خبرها وقولت اعذرها .. بوها جبرها ع الكريهه اجبار
ومن لحظة رحيله خمسطاشر ليلة .. والدمع من عيني تقول امطار
حازن بدمعي وشبحي وسمعي .. وكل عضو فجسمي بكى وانهار
من عيب هلها ضايقة حنظلها ..وللي جهلها ياخذوه انذار
وقالو انساها ماتجيب سماها .. ولا عاد تجبد للغلا تذكار
هدت وشدت للرحيل ومدت .. موكب ترك سبها مع الافجار
ومن دار سيه مانكافي زيه .. حتى ونا في موجعة واقهار
وافي انصافي مانكافي جافي .. وديما على عيب الحياه صبار
وهاني وراضي حاضري والماضي .. حتى وهو بالعيب ياما دار
وياما قهرني وع المرار جبرني .. وما من عزيز وصوب راح دمار
ولا من نشدهم في سريب جبدهم .. وهاهم بعدهم خاليات اديار
ولا عاد بانوا ولا علينا هانوا .. اللي قبل كانوا زايدين اصرار
من ليهم اشتقنا وبعدهم ماطقنا .. ولا عاد راقن بعدهم الانظار
ولا عاد بين من عليه احنين .. اللي ماو هين جفوته تذكار
من وصفه الديين رطبوله لسيين .. عدوان بانوا في قناع اخيار
نبي كيف ننسى منو كاين ونسه .. وغالي على الخاطر وع الانظار
وننسى سريبه مانبيه يجيبه الخاطر .. ويجبد صورته وتذكار
نبيه مايعده صوب ناير خده .. اللي اليوم جا دونه وعر واوعار
والانظار صافن والمعيشه عافن .. وقالن بلاها مازهى يندار
زهاهن معاها قربها ورضاها .. والعيشه بلاها قطمره واقهار
وجالن وجنها وين مالقينها .. واجد بكنها بالدموع انظار
وبيين زعلهن وين وجهتلهن .. سؤاالي على غالي عليهن جار
قاسن الغربة في جفاه وقربه .. ومن وقت ضربة غدر باستمرار
وين ما انضرت بالخطا وانجرت .. وضاقت اللوان الموجعة وامرار
صدفه لقيته بو عيون فليته .. جاني وجيته بشوق نين انهار
سالن دموعه يشهدن باللوعه .. اللي قاسها من قبل ياما دار
بكيت وقالت مانست لا غالت .. بدموع سالت بينت ماصار
وقالت اعذرني ع الفراق جبرني .. اللي قبل في عيبه علينا جار

هناك تعليق واحد:

نرحب بتعليقاتكم على منشوراتنا و تذكروا قول الله تعالى و ما يلفظ من قول إلا لديه رقيب عتيد