شعر شعبي ليبي للشاعر المبدع صلاح الغزالي

شعر شعبي ليبي للشاعر صلاح الغزالي

خليه خاطري امسكر علي مافيه=راك تفتحه تبكي اسنين عليه

ماتقرب شوره=خليه فاقد بسمته وسروره
وخليه دافن علته مطمورة=وخليه متناسي الي مكديه
لو تقربه تبقى اسباب اسموره=وتخطر عليه اقهار وتبكيه
اشبوب الزها مايوم نزلن شوره=وديما الي في غايته اتخاطيه
عاليات ماهدين نهار ابحوره=لرياح لربعة تخلاق برمن بيه
عايش معيشة اتقول بين اقبوره=ان كانهو خذا غفوة خيال ايجيه
وعايش ابنار املهلبة مكبورة=اتقول حالفة بيمين ماتخليه
محبوس ابضليمة افسجن عالي سوره=وفارح ابحكم اعدام ومراجيه

خليه خاطري امسكر علي مافيه=راك تفتحه تبكي اسنين عليه

امسكر بابه=لاتفتحه تبقى اسباب عذابه
واتخطر عليه اوحود كانو احبابه=وكانو اعزاز افوقت في ماضيه
ودارو الي مادارها في احسابه=فيهم ان حتحته ابهم عزيه
منهم فقد السيطرة وصوابه=ايهفو اوقات اينزحو ماقيه
لاتخطرة راني قفلت اكتابه=موالهم حسبت الي ناسيه

خليه خاطري امسكر علي مافيه=راك تفتحه تبكي اسنين عليه

لاتخطر ماضي=هو سبب جرحي وهو اسباب امراضي
الخاطر معبا اهموم ماهو فاضي=خزين الكواين ساده كافيه
امغير مايوري دائماً متغاضي=لو تدخله ماعد حياة اتعطيه
خصما محامي ومستشار اوقاضي=حكم البراءة مانهار ايجيه
عاش في زمان عليه ماهو راضي=قاوم نصيب اوفالعقاب ارضيه

خليه خاطري امسكر علي مافيه=راك تفتحه تبكي اسنين عليه

خله امسكر=لوتفتحه ماضي نساه اتذكر
وتخطر عليه الي عليه تنكر=الي بايعه وهو بالغلا شاريه
اسباب الخطا فيهن الخاطر فكر=ايريد يلتمسله عذر مولاقيه
ضايق ملاجه خاطري متعكر=وحامل مرض ماعد دواء يشفيه
وسابق خريفه عالربيع وبكر=وياس ابقبالي يردمن سافيه

خليه خاطري امسكر علي مافيه=راك تفتحه تبكي اسنين عليه

قصيدة كابرت لكن في العقاب بكيت للشاعر صلاح الغزالي

قصيدة للشاعر صلاح الغزالي كابرت لكن في العقاب بكيت


كابرت لكن في العقاب بكيت وقتي غلبني ع الدموع رميت
نكابر ونكمي ديما وطامر مواجع هالزمان وظيمه
وسيات من كانوا كبار القيمة خلاص فاض بيا م الزمان مليت
ظلمت روحي ياعليك ظليمة هي تقول ابكي ونا نقول نسيت
جريمة كبيرة ياعليك جريمة يبيعك اللي باغلى اسعار شريت
صحيح هي الدنيا عندها تبريمة لكن اطيح طياح صدق ماظنيت
طاحت وخلتني عقاب هشيمة وطاحن بيوتي بيت جرت بيت
واجد دفرته هالزمان جحيمة عاندت لكن في العقاب رخيت
والعين باتت م الدموع عديمة انعميت عما ماعاد بيها ريت
نكابر ونا مليان ونضحك ونا قصة بكا واحزان
نلقاني مليت م الكتمان لا موت جتني لا هناي لقيت
عايش معيشة فاقدة الحنان ماعمرني جرعة حنان خديت
صارعت واجد في هالزمان واخر مطافي طحت ماصبيت
كشر انيابه ع الحقيقة بان وهدم اللي بيدي زمان بنيت
خاني ونا في رفقته مطمان ولخونتي بعباي نا ما عبيت
نكابر ونا منهار وفي داخلي كمين نار ونار
وكامي اقهار مخلفات اقهار قريب ننفجر تفجير ديناميت
سقتني الدنيا كاس مر امرار جاني علي عطشة شربت لين رويت
قرطعت منا دار في مادار وجروح كانت هامدة حاييت
ناشدتها بالله باستفسار كني ايش داير لين هك بقيت
في الدين مسلم موش م الكفار ودرب الضلالة من زمان خطيت
ولا درت يادنيا دنوب كبار وخايف المولى والصلاة صليت
منك عماري ليش تم دمار خلاص يادنيا م الحياه مليت